QASTROPANKREATODUODENAL REZEKSİYA ZAMANI AŞKAR OLUNMUŞ ANOMAL İNKİŞAFLI YUXARI MÜSARİQƏ VENASININ PREDUODENAL, REKANALİZƏ OLUNMUŞ GÖBƏK VENASINA DRENAJI: NADİR KLİNİK HAL
N.Ə.Əsgərov, Ə.X.Kərimov, F.Ə.Zeynalov, Ü.S.Əmirov, T.E.Hüseynov, M.R.İsmayıllı
Milli Onkologiya Mərkəzi, Bakı, Azərbaycan
ANOMALOUS SUPERIOR MESENTERIC VEIN DRAINING INTO A RECANALIZED UMBILICAL VEIN VIA A PREDUODENAL ROUTE, DETECTED DURING GASTROPANCREATODUODENECTOMY: A RARE CLINICAL CASE
N.Asgarov, A.Karimov, F.Zeynalov, U.Amirov, T.Huseynov, M.Ismayilli
Abstract
Background. The portal vein normally forms behind the pancreatic neck through the confluence of the superior mesenteric vein (SMV) and the splenic vein. Congenital anomalies of the portal venous system, including the preduodenal portal vein, are rare and may pose significant intraoperative risks during hepatobiliary-pancreatic surgery.
Case presentation. A 62-year-old man with adenocarcinoma of the pancreatic head and obstructive jaundice underwent gastropancreatoduodenectomy (Whipple procedure). After routine division of the round ligament, unexplained venous congestion and edema of the small bowel were observed, and the portal vein appeared unusually thin. Further dissection revealed an anomalous SMV with preduodenal localization, draining into the liver parenchyma through a recanalized umbilical vein within the round ligament. An end-to-end venous anastomosis (~12 mm) was performed between the SMV and the recanalized umbilical vein, resolving the intestinal congestion. The postoperative course was uneventful, and contrast-enhanced CT on postoperative day 9 confirmed adequate flow.
Conclusion. Drainage of the superior mesenteric vein via a recanalized umbilical vein is a rare but potentially life-threatening portal system variant. During pancreatoduodenectomy and other hepatobiliary-pancreatic procedures, the round ligament may carry a functional vascular structure; early recognition and timely vascular reconstruction are crucial to prevent intestinal ischemia.
Keywords: preduodenal portal vein, superior mesenteric vein, recanalized umbilical vein, pancreaticoduodenectomy, portal venous anomaly, case report
Giriş
Normal anatomiyada qapı venası yuxarı müsariqə venası ilə dalaq venasının pankreasın arxasında birləşməsi nəticəsində formalaşır. Portal sistem embrional dövrdə vitellin venalardan inkişaf edir [1, 8].
Preduodenal qapı venası və digər portal variasiyalar ədəbiyyatda təsvir olunmuşdur [2, 3, 7]. Lakin YMV-nin əsas drenaj yolunun rekanalizə olunmuş göbək venası vasitəsilə həyata keçməsinə həm bizim praktikamızda, həm də ədəbiyyatda rast gəlinməmişdir [4].
(a) Normal anatomiya
(b) Xəstədəki variant
Klinik Halın Təsviri
20.02.2026 tarixdə 62 yaşlı kişi xəstə Y260004626 nömrəli xəstəlik tarixi ilə mədəaltı vəzin başının adenokarsinoması, mexaniki sarılıq diaqnozu ilə Milli Onkologiya Mərkəzinə müraciət etmişdir. MRT müayinəsinə əsasən proses rezektabel qiymətləndirilmişdir.
Əməliyyatdan sonra retrospektiv olaraq MRT filminə diqqətlə baxıldıqda YMV-nin klassik qapı venasına deyil, preduodenal yerləşmə ilə girdə bağın içərisindən qaraciyər parenximasına daxil olduğu aydınlaşmışdır.
İntraoperativ olaraq Whipple əməliyyatına başlanmışdır. Girdə bağ standart qaydada bağlanaraq kəsilmişdir. Bir müddət sonra nazik bağırsaqlarda izahsız venoz durğunluq və ödem müşahidə edilmişdir. Qapı venasının qeyri-adi dərəcədə nazik olduğu diqqəti cəlb etmişdir.
Əlavə diseksiya zamanı 12 mm diametrdə, ucu bağlı, girdə bağın kəsilmiş toxumaları daxilində anomal inkişaflı YMV aşkarlanmışdır. YMV-nin girdə bağ daxilində rekanalizasiya olunmuş göbək venası vasitəsilə drenaj edildiyini müəyyən edilmişdir. Dərhal YMA mənfəzinə 5000 vahid heparin yeridilmişdir.
(a) Girdə bağ daxilində kəsilmiş YMV
(b) Uc-uca venoz anastomoz
YMV diseksiya edilmiş, girdə bağdakı liqatur açılmış, retroqrad qan axını müşahidə olunmuşdur. Hər iki damarın diametri ≈12 mm olmuş, uc-uca anastomoz icra edilmişdir. Anastomozdan sonra bağırsaqlarda venoz durğunluq aradan qalxmışdır.
Postoperativ dövr ağırlaşmasız keçmiş, Doppler müayinəsində portal axın qənaətbəxş olmuşdur. Əməliyyatın 9-cu sutkasında kontrastlı KT-də anastomozda adekvat qan axını təsdiqlənmişdir. 15-ci gün xəstə ambulator müalicəyə yazılmışdır.
(a) Aksial kəsik
(b) Koronal kəsik
Müzakirə
Portal sistem vitellin venaların mürəkkəb embrional yenidənqurulması nəticəsində formalaşır. Selektiv geriləmə pozulması nadir damar variasiyalarına gətirib çıxara bilər [1, 8].
Göbək venası normalda doğuşdan sonra obliterasiya olur. Təqdim olunan halda obliterasiya olunmayan göbək venası YMV üçün əsas drenaj yolu idi. Girdə bağın rutin kəsilməsi mezenterial venoz axının kəskin pozulmasına səbəb oldu [2, 3, 7].
- Qeyri-adi nazik qapı venası alternativ drenajın olmasını düşündürməlidir.
- İzaholunmayan bağırsaq sianozu dərhal venoz anatomiyanın yenidən qiymətləndirilməsini tələb edir.
- Preoperativ kontrastlı KT venoz fazada belə variasiyaları aşkarlamağa kömək edə bilər.
Nəticə
YMV-nin rekanalizə olunmuş göbək venasına drenajı nadir, lakin potensial həyati təhlükəli portal sistem variasiyasıdır.
Hepatopankreatobiliar əməliyyatlarda girdə bağın funksional damar strukturu daşıya biləcəyi nəzərə alınmalıdır. Erkən tanınma və vaxtında damar rekonstruksiyası bağırsaq işemiyasının qarşısının alınmasında həlledici rol oynayır.
İntraoperativ video — Anomal YMV-nin aşkarlanması və uc-uca anastomoz
Əməliyyat videosu
Ədəbiyyat
- 1.Iwasaki Y, et al. Surg Case Rep. 2022;8(1):26.
- 2.Wang J, et al. Front Surg. 2023;10:1239835.
- 3.Shimizu S, et al. Surg Case Rep. 2023;9(1):63.
- 4.Knight HO. Ann Surg. 1921;74(6):697–699.
- 5.Lafortune M, et al. AJR Am J Roentgenol. 1985;144(3):549–553.
- 6.Mori K, et al. Pediatr Surg Int. 2026;42(1):15.
- 7.Gajbhiye R, et al. J Indian Assoc Pediatr Surg. 2016;21(4):177–179.
- 8.Yagi T, et al. Surg Today. 2003;33(12):956–959.